انتى اتجننتى
بعد اسبوع "يوم الفرح"
نادرة كانت قاعدة في البيوت سنتر وهي فرحانة جدا ومتوترة وخايفة من سعادتها تتقلب ويحصل مشاكل لكن قررت تعيش متعة وجمال اللحظات
نغم كانت قاعدة معاهم وهي بترقص مع البنات مع الاغاني
نغم: بقولك ايه يا نادرة عايزة ابقى خالتو... معاكي ظرف تسع شهور فاهمة يا بت
نادرة بارتباك:اتلمي يا جزمة ولا انتي انحرفت بعد الجواز...
نغم: يلهوي يلهوي اتلم... انا مش مطمنة للبت دي يا مرجانة، اتلم ايه لا بصي فرفشي كدا....
انتي اصلا مش محتاجة نصايح هو حسن لبس واتدبس خالص.
نادرة بغيظ:اتدبس في ايه ان شاء الله هو يطول
مرجانة:عمرك ما هتتغيري بلسانك دا، على الله حكايتك انتي وهو
نادرة بدلال:بس برضو احلى تدبيسه
نغم:اللعب
نادرة ضحكت وهي بتحاول تهرب منهم وهي بتبص لبسبوسة
نادرة:هو فاضل كتير؟
=لا انا خلصت خلاص بسم الله ماشاء الله ملامحك جميلة مش محتاجة حاجة....
في بنت دخلت واتكلمت معهم
=الحج موسى عايز يتكلم مع العروسة شوية
نادرة:بابا... طب معليش تخرجوا شوية
كلهم خرجوا وفضلت نادرة
موسى ابتسم وهو بيبصلها، نادرة قامت وهي بتحاول تظبط فستانها الأبيض
=بسم الله ماشاء الله...معقول كبرتي وهتتجوزي
اه يا نادرة... اه يا بنت قلبي عشت طول عمري ادعي ربنا اني اسلمك بأيدي لابن الحلال.. عيشت طول عمري خايف مكنش معاكي في يوم دي دا... انتي ازاي جميلة كدا
نادرة بحب وهي بتمسك ايده وبتبوسها:
=بابا هو انا ينفع اقولك انك بجد أجمل حاجة في حياتي ونفسي ارفع راسك دايما واخليك فخور بيا.
موسى بابتسامه:
=و انا فخور بيكي وفخور انك بنتي واني عندي بنوته قلبها ابيض زيك
عارفه يا نادرة لما شفتك اول مرة وحضنتك بعد ولدتك حسيت بدف حسيت بروح حلوة اوي بتحوطني، كبرتي وبقيتي عروسة
سنية كانت هتفرح اوي... اكيد هي فرحانة انك فرحانة
نادرة:انا كان نفسي تكون معايا وتحضني يا بابا بس حاسة انها مرتاحة دلوقتي، بابا هو انت بتكره ماما.
موسي:
=يعلم ربنا اني عمري ما كرهتها، وحتى لو
كفاية انها خدتني بأجمل هدية، أنا وهي يمكن اطلقنا لكن مش معنى كدا اننا كرهنا بعض
انا طلقتها علشان مكنتش عايز اوصل للمرحلة اللي اكرهها فيها علشان بحبك لو كنا كملنا كنا هنتعب بعض اكتر وهنتعبك وسطنا بس ارادة ربنا انها تموت
شوفي يا نادرة اعتبرها نصيحة
الراجل بيحتاج من العلاقة انه يلاقي حد يطبطب عليه لما يزعل، حد يونسه، حد يفهمه لما يكون مخنوق ومش عايز يتكلم
لما يقولك سبيني لوحدي احضنيه وخليكي معه
لما تحسي انه زعلان ابتسمي في وشه
و لما تزعلي صارحيه، الراجل مبيحبش يحط راسه على المخدة والست اللي جانبه شايله منه..... بصي يا بنتي انا عايزاك تكون سعيدة في حياتك علشان كدا بقولك حبي حياتك معه وخليه يحس انك راضيه
و حاولي تفهميه ..... صدقيني لو انا شايفه مش مناسب ولا حتى صايع او ميستاهلكيش عمري ما كنت هفرط فيكي
و سامحيني لو قسيت عليكي يوم ببقى خايف عليك يا نادرة وخايف تتوجعي صدقيني يا بنتي
نادرة بابتسامة:
=احضني يا بابا.....
موسى ضحك وهو بيشدها لحضنه وهي غمضت عينيها واتنهدت براحة وبهمس
=انا بحمد ربنا انك ابويا وسامحني انت لو قصرت يوم في حقك....
جليلة من وراهم:
=الله الله انتم مقضينها احضان من ورايا
نادرة ابتسمت وبعدت عنه وهي بتمسح الدموع اللي اتجمعت في عنيها
