انتى اتجننتى

=ياريت كل الناس زيك... بس أنا عمري ما هكون زوجة كويسة.. أنا هكون زيها، عارف وربنا أنا كل يوم كنت بسمع كلام كتير عنها حاولت اكدبهم وأنا حاسة أنها مش وحشة

هي برضو كانت لسانها طويلة وعنيدة 

هي كانت مهملة في حاجات كتير وأنا منهم 

و انا كمان زيها..... أنا مش هعرف اربي أطفال واهتم ببيت 

أنا كل اختياراتي غلط. وكل الناس بيتخلوا عني. 

مش عايزاه اتساب... مش عايزاه اتوجع

حسن بابتسامة:

=طب طول الفترة اللي فاتت أنا زعلتك مني بصراحة... في الفترة دي حسيتي أناني لدرجة اني ممكن اتخل عنك

نادرة:

=معرفش يا حسن أنا بقيت خايفة من اختيارتي... خايفة البس في مصيبة. 

حسن بضحك:

=للدرجة دي... مصيبة طب ياستي أنا عجبني المصيبة دي وعايز اتجوزك ها ايه رايك

نادرة:

=مش هتزعل لما نتخانق كل يوم ونتكلم في حاجات تافهه وتيجي من الشغل تلقيني حارقه الاكل وساعات نايمة وهدومك مش نضيفة ومخلصة فلوسك في الأكل من برا 

حسن بص حواليه مكنش في حد، عدل قعدته وبصلها وهو ماشك ايديها وبيلبسها الدبلة وبدا يمسك صوابعها:

=أولا هنصحي سوا بدري لأن مش بحب افطر لوحدي وهنحضر الفطار سوا

ثانيا أنا ممكن اساعدك في البيت لأن بعمل كدا مع أمي لما بتتعب ومعنديش مانع اعمل كدا معاكي بس لما أكون تعبان من الشغل هسيبك تعملي دا لوحدك 

ثالثا:خلصي فلوسي براحتك بس صدقيني بعد الجواز هناكل في البيت لان بحب اكل البيت بس مفيش مانع نخرج تلات اربع مرات  في الشهر ناكل برا 

عارف انها هتبقى مرة وحيدة بس لو الدنيا ماشية معايا تمام هظبطك 

أنا مرتبي يعيشانا مرتاحين الحمد لله وصدقيني مش هيجي يوم واخليك تحطي راسك على المخدة جانبي وأنتي زعلانة مني 

حتى لو زعلنا ودا طبيعي بين اي اتنين وقتها مش هسيبك. 

نادرة:وعد 

حسن:وعد ياستي بس فكي كدا ممكن اعرف بقا سبب الزعل دا كله ايه مش كنت كويسين امبارح. 

نادرة بكدب:مفيش بس كنت خايفة ومتوترة 

حسن بابتسامه:طب ايه رايك اعزمك على فراولة بلبن 

نادرة:بحبها 

حسن بحب: عارف يا نادرة، خلينا بقا نتمشى وهجيبلك اللي أنتي عايزاه كله... 

نادرة:هو انتي مش خايف فلوسك تخلص بجد أنا أصلا الفترة الأخيرة كل ما بنخرج بتجبلي حاجات كتير وبتعزمني على أكل كتير. 

حسن بابتسامه وهو بيمسك ايديها وبيقوم:

=متقلقيش الحمد لله الخير كتير بس بلاش تعيطي انتي فاهمة وبعدين أنا بحب كلامك الدبش دا فاهمة. 

نادرة بصتله بارتياح ومسكت في ايديه بقوة 

=يلهوي يلهوي جليلة هتنفخني.... أنا لازم اروح 

حسن:طب مش همتاخر تعالي هجيبلك اللي أنتي عايزاه وهروحك وكمان علشان اجهز 

نادرة: مش مهم دلوقتي لما نتجوز هبقي اعملها في البيت. 

حسن بصلها وابتسم وهي شديت ايديه علشان يرجعوا البيت لان الوقت اتأخر 

"لا تطيل النظر فالعاشق تفضحه عيناه" 

نادرة رجعت البيت مع حسن وهي خايفة من ردة فعل جليلة لما تشوفها، بصت لحسن وهي على وشك أنها تعيط

حسن باستغراب:مالك؟

نادرة:جليلة لو شفتني هتعمل مني كفتة هي قالتلي متتاخريش وانا اتأخرت اوي

حسن:خالص خلينا نطلع سوا وأنا هحاول افهمها.

نادرة بحدة:

=لا مش مهم أنا هطلع لها لوحدي وكمان علشان تلحق تجهز لبليل.

حسن ابتسم ونزل من على الموتسكل، مسك ايديها بقوة:

=ياله متخافيش مش هتعملك حاجة وبعدين هو أنتي فكراني زيك يا بنتي أنا بجهز في تلات دقايق والحلاق بكتيره نص ساعة